Aye Mohabbat Tere Anjaam Pe Rona Aaya

Aye Mohabbat Tere Anjaam Pe Rona Aaya,
Jaane Kyon Aaj Tere Naam Pe Rona Aaya,

Yun To Her Shaam Ummeedon Mein Guzar Jati Hai,
Aaj Kuch Baat Hai Jo Shaam Pe Rona Aaya,

Kabhi Taqdeer Ka Matam, Kabhi Duniya Ka Gila,
Manzil-e-Ishq Mein Har Gaam Pe Rona Aaya,

Jab Hua Zikr Zamane Mein Mohabbat Ka Shakeel,
Mujh Ko Apne Dil-e-Nakaam Pe Rona Aaya.

(Shakeel Badayuni)